A Xunta de Galicia continúa avanzando na súa Estratexia Galega de Solo Residencial coa recepción de oito ofertas de empresas para redactar o Proxecto de Interese Autonómico (PIA), entre elas catro destinadas ao desenvolvemento urbanístico dun ámbito situado en Vilagarcía de Arousa, que permitirá a construción de vivenda protexida.
Este contrato, licitado por un orzamento de 568.911 euros, inclúe a redacción do PIA, o proxecto de expropiación e o plan de parcelamento para dous ámbitos: un en Vigo e outro en Vilagarcía. En total, preténdese obter 20,1 hectáreas de solo, das cales 6,2 hectáreas corresponden ao municipio arousán.
O ámbito elixido en Vilagarcía está situado entre a avenida das Carolinas e as rúas Coca e Arealonga, unha zona de forte demanda residencial. Segundo as previsións da Consellería de Vivenda, nesa superficie poderán construírse 350 vivendas protexidas, unha actuación que busca dar resposta ás necesidades de acceso á vivenda a prezos accesibles na comarca do Salnés.
Esta intervención enmárcase dentro dun plan máis amplo da Xunta para urbanizar solo e facilitar a construción de ata 25.000 vivendas en Galicia, das cales 20.000 serán protexidas. A primeira fase da estratexia inclúe tamén actuacións en cidades como Pontevedra, Lugo, Ourense, A Coruña e Arteixo.
O ámbito de Vilagarcía foi definido en consenso co Concello, o que permitirá unha tramitación máis áxil do proxecto e unha futura execución coordinada coa administración local.
