O Campionato Galego de Traiñeiras terá lugar na parroquia de Aguiño, no Concello de Ribeira, os vindeiros 7 e 8 de xuño. O anuncio fíxose público hoxe nun acto no que participaron o alcalde de Ribeira, Luís Pérez, o concelleiro de Deportes, Xabier Vidal, o concelleiro do Mar, Fernando Abraldes, o representante da Federación Galega de Remo, Gustavo Vázquez, e o presidente do Club de Remo Náutico de Ribeira, Jesús Silva.
Xabier Vidal agradeceu á Federación Galega de Remo a confianza depositada no municipio, destacando que dende o ano 2011 non se celebraba unha competición deste nivel en Ribeira. Tamén puxo en valor o labor organizativo do Club de Remo de Ribeira e, en especial, o traballo do seu presidente, Suso Silva.
Pola súa parte, Gustavo Vázquez salientou a importancia dos clubs e dos concellos na organización do campionato e destacou o enclave privilexiado de Aguiño, que presenta condicións naturais que poden incrementar a emoción das regatas. Tamén fixo fincapé no impacto económico positivo que terá a competición, con máis de 600 deportistas en liza durante a fin de semana.
O alcalde, Luís Pérez, subliñou que a celebración deste evento supón unha oportunidade para dar a coñecer Ribeira como destino deportivo e turístico. Reivindicou as condicións únicas do campo de regatas en Aguiño, con ondas e correntes que engaden dificultade e atractivo ás probas.
Ademais, Pérez falou sobre as novas instalacións que se están a construír para o Club de Remo, moi demandadas nos últimos anos. Avanzou tamén unha nova solicitude a Portos de Galicia para ampliar o espazo dispoñible co obxectivo de mellorar as condicións de adestramento e fomentar a participación no deporte do remo.
