Os veciños das rúas Canteira e Valle-Inclán viviron unha desagradable sorpresa na mañá do domingo ao descubrir que numerosos vehículos amenceran sen matrícula. O que comezou como un caso illado revelouse rapidamente como un roubo múltiple, cunha longa ringleira de coches afectados ao longo de ambas rúas.
A alarma social non tardou en trasladarse ás redes, onde os afectados compartiron fotos e pedimentos de axuda cidadá. A investigación está xa en mans da Policía Nacional, que por agora non realizou ningunha detención.
Entre os veciños hai dúas teorías principais: algúns consideran que se trata dun acto de vandalismo sen máis, mentres que outros temen un uso fraudulento das placas roubadas.
Nalgúns coches, os danos foron máis aló da perda da matrícula. Un deles quedou con media placa arrancada, mentres que outro sufriu unha roda picada tras un intento fallido de sustracción.
A maioría das vítimas xa procederon a denunciar os feitos e substituír as placas para poder seguir circulando. Mentres tanto, a policía continúa as pesquisas para dar cos responsables desta acción que mantén en vilo a veciñanza e esixe unha resposta urxente en materia de seguridade cidadá.
