Trala acostumada sesión diaria da Comisión Municipal de Seguimento da Evolución do COVID-19, o Concello de Ribeira achegou este luns 30 de marzo importantes novidades sobre os labores despregados no termo municipal para combater o espallamento da pandemia e axudar aos colectivos que máis están a sufrir coa crise sanitaria derivada do estado de alarma. Segundo se fixo saber, a Xunta enviará ao Concello unha terceira remesa de material de protección. Este subministro únese aos efectuados a semana pasada: dúas partidas con máscaras e luvas, e outra de buzos. No terceiro envío haberá 350 máscaras cirúrxicas, 6 botes de xel hidroalcohólico, unha garrafa de 5 litros de desinfectante clorado, 12 traxes antisalpicaduras e 60 batas protectoras. A Comisión salientou que a autonómica “foi a única Administración que polo momento dotou de material ao noso Concello”.
Amais do devandito, na sesión tamén se acordou a adopción de gastos por parte do Concello do traslado e enterramento dunha persoa usuaria de Servizos Sociais falecida por coronavirus no Hospital Álvaro Cunqueiro de Vigo. Así mesmo, informouse das xestións realizadas a través da Secretaría de Emigración da Xunta de Galicia para a repatriación dun cidadán ribeirense que se atopa en Bos Aires.
Para rematar, a Comisión acordou expresar o agradecemento do Concello a “aquelas persoas propietarias de pisos que están a ofrecer as súas propiedades para aloxar a persoal sanitario do Hospital” e á empresa Cárnicos García de Oleiros pola doazón de alimentos.
Súmanse a outros agradecementos expresados durante a fin de semana a Carlos Mariño, Jandro Ayaso e o resto dos promotores e colaboradores do festival en streaming Illote; aos voluntarios con impresoras 3D que están a fabricar máscaras de plástico; ao Concello da Pobra por doar o material para facer posíbel a iniciativa pobrense do material de protección; a Conxelados Basoñas Mar, pola “doazón de produtos para os bancos de alimentos”; e a Tarrío y Suárez, que “doou 40 buzos protectores”.
