O secretario de Estado de Cultura, Jordi Marti Grau, recibiu esta semana ao alcalde de Rianxo, Julián Bustelo, para abordar diferentes asuntos de interese para o municipio rianxeiro. Na xuntanza, que tivo lugar no Ministerio de Cultura, analizáronse as posíbeis vías de colaboración entre as dúas administracións para impulsar proxectos relacionados coa dinamización e o fomento da cultura. En particular, abordouse a iniciativa específica para a transformación da Casa do Mar na futura Casa da Música de Rianxo, un proxecto que busca converter o actual inmóbel “nun centro de referencia para as bandas e as asociacións de música e baile tradicional”, tal e como sinalou o alcalde.
Bustelo valorou moi positivamente a xuntanza e destacou o “esforzo do Executivo rianxeiro por establecer alianzas coas diferentes administracións para impulsar iniciativas de interese para a veciñanza de Rianxo”.
