O Ciclo Mestre Mateo arranca a súa cuarta edición na provincia da Coruña grazas ao apoio da Deputación de Coruña. Os detalles da xira foron dados a coñecer en rolda de prensa na sede da institución, coa presenza da deputada de Cultura, Natividade González, e a vogal da Academia Galega do Audiovisual, Alba Gallego, quen presentaron as novidades da mostra, que proxectará algunhas das obras finalistas e premiadas nos Mestre Mateo en diferentes concellos da provincia. A primeira delas terá lugar este venres 9 de maio en Betanzos.
Ademais de Betanzos, os concellos de Boiro, Cedeira, Cerceda, Valdoviño e Vimianzo proxectarán as producións finalistas nas categorías de longametraxe e documental dos XXIII Premios Mestre Mateo: As Neves, de Sonia Méndez; Xustiza artificial, de Simón Casal; Honeymoon, de Enrique Otero; + Cuñados, de Luis Avilés; e os documentais Filmei paxaros voando, de Zeltia Outeiriño; Salvaxe, salvaxe, de Emilio Fonseca; Aurora, de Area Erina e Prefiro condenarme de Margarita Ledo.
A deputada, Natividade González, apuntou que “o cinema segue a ser protagonista na provincia da Coruña” e para a administración “é importante seguir apostando para que este tipo de proxectos se leven a cabo. O ciclo chega a lugares onde non existen grandes pantallas, polo que esta iniciativa é un exemplo máis do noso compromiso cunha cultura accesíbel para todos os veciños e veciñas da provincia”.
Pola súa parte, Alba Gallego destacou “a importancia de que o cinema galego chegue a todos os recunchos do país, especialmente a aquelas localidades que non contan cunha programación audiovisual estábel”. Engadiu que “o Ciclo Mestre Mateo é unha ferramenta fundamental para fortalecer o vínculo da cidadanía co noso audiovisual, poñendo en valor o talento, a diversidade e a capacidade de contar historias propias que temos en Galicia”.
