O Concello de Dodro informou de que xa está aberta a inscrición para a 5ª Camiñada Nocturna de Dodro, que será o venres 30 de maio e que está organizada polo colectivo Remonte e o Concello de Dodro, coa colaboración da Deputación da Coruña. Este ano a saída será dende as 22.30 horas dende o Polideportivo Municipal de Dodro. A entrega dos dorsais levarase a cabo entre as 21.00 e as 22.00 horas.
O percorrido, circular de 12 quilómetros, é de baixa dificultade e transcorrerá polas 3 aldeas da parroquia de Dodro. Haberá servizo de vestiarios e duchas. Ao finalizar a proba as persoas participantes recibirán un diploma e haberá chocolate quente con rosquillas de Lestrobe.
Para formalizar a inscrición (prezo 5€) o prazo ficará aberto até as 20.00 horas do 27 de maio ou ata completar as 150 prazas dispostas pola organización. A Concellaría de Deportes de Dodro achegará 50 prazas de balde para as/os veciños de Dodro e asignaranse por orde de inscrición. Para participar, a organización lembra que cómpre ter unha mínima preparación física e traer unha lanterna ou frontal, unha mochiliña con apósitos adhesivos e cantimplora (non se dará vaso no avituallamento). Xa está dispoñíbel na Rede a ligazón para formalizarmos a inscrición.
