A obra Manuela Rey Is In Da House vai iniciar un novo percorrido pola xeografía galega. O espectáculo teatral iniciará en Ribeira a xira galega que percorrerá oito cidades durante os vindeiros meses, entre elas A Coruña, Pontevedra, Ourense, Lugo ou Vigo.
Á presentación acudiron Antía Alberte, concelleira de Cultura de Ribeira, o director do Centro Dramático Galego, Fran Núñez, que é tamén director do espectáculo desta coprodución do Centro Dramático Galego, Teatro do Noroeste-Centro Dramático de Viana, Teatro Nacional São João e Teatro Nacional D. Maria II, coa dirección e dramaturxia de Fran Núñez a partir de textos de Manuela Rey e outros autores.
A representación da obra Manuela Rey Is In Da House terá lugar no Auditorio
Municipal de Ribeira o mércores 30 de abril, ás 21:15 h, véspera do festivo 1 de maio.
Esta obra só se representou en Santiago xunto a catro vilas portuguesas e
agora inicia en Ribeira unha nova xira por cidades galegas.
“A cultura non é só un entretemento, ten que ser unha fiestra para concienciar á xente, facela reflexionar e por en valor o patrimonio cultural, ambiental e tamén o patrimonio de persoas como vén sendo a figura de Manuela Rey”, sinalou Antía Alberte.
Pola súa banda, Fran Núñez agradeceu ao Concello por acoller a primeira función “desta xira por Galicia”. Núñez falou sobre a dificultade das primeiras funcións, “e máis nun espectáculo deste tipo de moi gran formato”. Tamén falou da vinculación de Ribeira coa obra, “xa que o ano pasado os veciños e veciñas deste concello viñeron vela a Santiago nun autobús e tamén foi fretado outro dende Ribeira para asistir á función en Porto” e rematou: “Vir a Ribeira é como vir a casa e fainos moitísima ilusión a todo o equipo porque ver 50 persoas de Ribeira comendo coa dirección de produción do Teatro Nacional São João e celebrando a vida de Manuela Rey, foi das cousas máis bonitas que levamos para casa nisto de vivir do teatro”.
As entradas serán a través de Ataquilla.com de xeito presencial na OAC da Casa do Concello de Ribeira, de 9 a 14 h con tarxeta bancaria e online en
Ataquilla.com a partir do vindeiro luns 21 de abril ás 9 h de xeito simultáneo. O prezo será de 9 € máis gastos de xestión para patio xeral e de 4,95 € máis gasto de xestión para visibilidade reducida, ata completar aforo.
O espectáculo está recomendado a partir de 16 anos, ten unha duración de 80 minutos e respecto do dossier hai unicamente un cambio no reparto, unha actriz que por motivos persoais muda por outra, concretamente Mariana Carballal non estará nesta xira ocupando o seu lugar a actriz Mercedes Castro.
