Máis alá das celebracións estritamente relixiosas da Semana Santa, a nosa comarca achéganos estes días varias citas festeiras para non perderse, entre as que se atopan as Festas de Pedrafurada de Caamaño, edición 2025. Desenvolveranse os días 19, 20 e 21 de abril, ou sexa, o sábado, o domingo e o luns de Pascua, e arrincará o sábado 19 pola noite cunha espectacular verbena no Campo de Fútbol coa Orquestra Capitol e, máis tarde, coa Capitol Discomóbil CDC.
A xornada do domingo 20 (na honra de Xesucristo Nazareno) comezará coas dianas e alboradas dos grupos de gaiteiros Trécola e Os Pequenos do Barbanza. Ás 13.00 horas está prevista unha misa solemne na Capela de Pedrafurada e ao remate haberá unha procesión. A sesión vermú (con petiscos a prezos populares) correrá a cargo do Trío La Noche. Pola noite a partir das 22.30 horas actuará de novo o Trío La Noche, na contorna da Capela de Pedrafurada.
O luns 21, día adicado á Nosa Señora de Pedrafurada, comezará con dianas e alboradas da man da Banda de Música de Caamaño e o do grupo de gaiteiros Canlebó de Camboño. Ás 10h e ás 11h haberá misas rezadas ca Capela de Pedrafurada. Ás 13 horas celebrarase unha misa solemne na honra da Nosa Señora de Pedrafurada rematada novamente cunha procesión. A continuación virá unha sesión vermú con gran churrascada de balde amenizada pola Banda de Música de Caamñao e a Charanga Milnueve. Pola noite 21 bombas de palenque porán remate á festa.
