O Concello de Muros, a través da Concellería de Turismo, organiza un roteiro nocturno aos petróglifos do Abrigo das Cruces e da Laxe das Rodas o vindeiro mércores 16 de abril ás 20:30 h. Trátase, segundo explicaron as responsábeis do dito departamento, “dunha actividade pensada para achegar á veciñanza e visitantes ao noso patrimonio arqueolóxico dun xeito diferente e atractivo”.
O punto de encontro será no CEIP de Louro e a ruta contará cunha dificultade media. As prazas estarán limitadas a 35 persoas, polo que será preciso realizar inscrición previa chamando ao teléfono do Concello: 981 826 050 (extensión 2).
A actividade está enmarcada dentro da aposta do Concello pola divulgación do noso patrimonio cultural e natural, combinando o valor histórico dos petróglifos coa experiencia única dunha visita nocturna guiada.
A concelleira de Turismo, Caridad González, animou do seguinte xeito á participación neste tipo de iniciativas: “Queremos que a veciñanza e quen nos visita descubran os tesouros do noso territorio e facelo de noite dálle un ton especial. Os petróglifos son unha pegada identitaria do noso pasado e actividades como esta permítennos valoralos como merecen.”
