O Concello de Muros aprobou no pleno municipal unha modificación da Ordenanza reguladora de uso das praias, uns cambios que teñen como obxectivo “mellorar a calidade de vida das persoas usuarias dos areais e promover a conservación do entorno natural”.
A alcaldesa e responsábel da área de medio ambiente, María Lago, reivindicou que “as nosas praias son un sinal de identidade de Muros, coidalas é unha tarefa conxunta”.
A modificación da ordenanza nace dun acordo plenario previo para a prohibición de fumar nas praias, que deixou vía libre para que o Concello de Muros entrase a formar parte da Rede de Praias Sen Fume de Galicia. “Queremos fomentar os hábitos de vida saudábeis e evitar a contaminación das cabichas”, explica Lago.
Coa nova ordenanza, o Concello fíxase outro obxectivo importante: impulsar a conservación da píllara das dunas e do entorno natural das praias con diferentes medidas de coidado e protección.
En relación con isto, coa modificación aprobada prohibe a presenza de animais domésticos durante todo o ano en praias que formen parte da Rede Natura ou nas que se constate a presenza da píllara das dunas. No resto, a prohibición de acceso seguirá sendo de 09:00 a 21:00 horas na tempada de baño.
Nas diferentes praias de Muros haberá carteis explicando as normas de cada areal. A ordenanza recolle outras medidas de convivencia e uso, todas elas coa intención de mellorar a calidade de vida das persoas e de contribuír a preservar a fauna e a flora protexida.
