Compostela Cultura programa o sábado 29 de marzo diversas actividades para afondar na memoria do rianxeiro Castelao, figura clave da cultura e a política galega. O Auditorio de Galicia acollerá pola mañá un faladoiro arredor do pensamento social e político do autor de Cousas e un obradoiro de debuxo para a rapazada que será conducido por Kiko da Silva. Á tarde, outra oportunidade de achegarse á súa pegada dende o teatro coa presentación do espectáculo para público familiar Castelao, de Culturactiva.
A exposición Ollos de vidro. As formas doutra historia de Galicia programa no mes de marzo unha serie de actividades complementarias á mostra que buscan afondar no pensamento e na obra de Castelao desde distintas perspectivas. Estas citas permitirán ao público adulto e miúdo mergullarse no universo creativo do autor e reflexionar sobre o seu legado.
Ambas as actividades gardan estreita relación coa programación escénica de Compostela Cultura que esa mesma tarde leva á Sala Mozart do Auditorio a representación de Castelao, unha peza teatral para público familiar con texto de Paula Carballeira e dirección de Fina Calleja que nos achega ao neno que unha vez foi Alfonso Daniel Rodríguez.
Faladoiro Memorias dun esquelete: o retorno do Castelao
A xornada arranca ás 12.30 horas no Auditorio de Galicia. A Sala Isaac Díaz Pardo que abeira a mostra serve tamén de espazo de encontro para Memorias dun esquelete: o retorno do Castelao, un faladoiro que, catro décadas despois do reenterro do autor engarza diferentes “ollos de vidro” para analizar o pensamento político na exposición. Por unha banda, o vidro de Tareixa Navaza a través das cámaras de televisión que retransmitiron a cerimonia de reinhumación; por outra banda, o lente a través do que Xan Carballa tomou as súas fotografías dese mesmo 28 de xuño de 1984, e para rematar, o da pantalla do ordenador do investigador Jorge Linheira. A estes cristais que ollan xúntanselles os raios-X artísticos da mostra comisariada por Germán Labrador con acompañamento de María Bella. E, así, neste faladoiro –moderado por Branca Novoneyra– lembraranse non só as disputas institucionais e políticas por ver, facer ver e ocultar o esquelete de Castelao, senón tamén os modos de relacionarnos hoxe cos diferentes retornos do seu fantasma. A participación é libre até completar capacidade.
Obradoiro de debuxo Castelao polo miúdo
En paralelo, e co gallo de achegar a obra de Castelao ao público máis novo, desenvolverase na Sala Circular do Auditorio o obradoiro Castelao polo miúdo, unha sesión de debuxo inspirada no volume Cousas. Dirixido á rapazada a partir de 10 anos, este obradoiro creativo estará conducido polo recoñecido humorista gráfico e viñetista Kiko da Silva, quen guiará as e os participantes na exploración do universo gráfico e narrativo de Castelao e sobre a retranca característica das súas viñetas. Esta actividade busca non “só fomentar a creatividade e o coñecemento da obra do autor, senón tamén facilitar unha comprensión máis profunda da súa linguaxe artística, da agudeza do seu humor e do seu compromiso coa realidade social da súa época”, segundo adiantan dende Compostela Cultura, engadindo que a participación é gratuíta, previa inscrición até o 28 de marzo a través da web de Compostela Cultura.
Con estas iniciativas, Ollos de vidro reafirma o seu propósito de transcender o espazo expositivo para converterse nun foro de reflexión, aprendizaxe e creación arredor de Castelao e da súa influencia na cultura galega.
Sobre as táboas, o rapaz que foi Castelao
A axenda teatral do sábado garda tamén lugar especial para este autor capital das letras galegas. Ás 18.00 horas representarase na Sala Mozart a obra Castelao, de Culturactiva, unha peza para público familiar escrita por Paula Carballeira e dirixida por Fina Calleja. Mónica Camaño e Cris Collazo conforman o elenco desta ficción sobre as matinacións e falcatruadas do neno Castelao nos días previos á súa saída cara á Arxentina.
A obra forma parte da programación En Familia e do foco Creadoras de Escena de Compostela Cultura. As entradas para o espectáculo teñen un prezo único de 3 euros e poden ser adquiridas de forma anticipada tanto na web compostelacultura.gal como no despacho de billetes da Zona C · Punto de Información Cultural. De existir aínda localidades dispoñibles tamén se poderán comprar no despacho de billetes do Auditorio o día do espectáculo dende as 17.00 horas.
