O vindeiro venres, 21 de marzo, celébrase o Día Mundial da Poesía, un festexo que nacía no ano 1999 co obxectivo de apoiar a diversidade lingüística a través da poesía. Dende A Pobra do Caramiñal queren unirse a esta celebración por segundo ano consecutivo e farano cun recital.
O Auditorio da Biblioteca Victoriano García Martí da Pobra acollerá na tarde do venres un recital de poesía ao que acudirán: Manuel Teira, Anxos Castro, María Fernández e Manuel López Rodríguez, catro autores da zona que estarán acompañados pola soprano noiesa Esperanza Mara.
“Logo do éxito do ano pasado, dende a Concellería de Cultura queremos poñer en valor unha vez máis a poesía e dar visibilidade aos e ás poetas, nun acto participativo ao que todo o mundo está convidado ”, sinalou Patricia Lojo, concelleira de cultura da Pobra do Caramiñal.
Engadir que ao remate do recital dos autores e autoras convidadas, aquelas persoas do público que así o queiran poderán participar coa lectura dos seus poemas.
