20190708. O mundo circense é a temática elixida para o Entroido Quente pobrense que se celebrará desde o 26 ao 28 de xullo. Esta peculiar cita, organizada polo Concello e a hostalería local, contará coa participación de 21 establecementos hostaleiros, pretendendo así dinamizar o sector e converter a Pobra nun atractivo turístico.
A xornada do venres 26 estará amenizada pola charanga Batukabras, para cederlle o testemuño á TNT o sábado 27. A recollida de premios terá lugar o domingo 28, ás 21.00 horas, na praza do Emigrante e será obrigatorio asistir co disfrace gañador. Os premios consistirán en 350 euros para o #Mellor Grupo, 250 para a #Mellor Parella, 150 para o #Individual + Orixinal, 150 para o #Individual + Divertido e 100 para a #Mellor Maquillaxe.
Para participar no concurso tan só hai que subir ao Facebook unha foto acompañada do hashtag #ENTROIDOQUENTEAPOBRA e do cartel da categoría na que se participe, o cal facilitarán os patrocinadores.
