En cumprimento das medidas adoptadas pola Xunta de Galicia con motivo da declaración do Estado de alarma, os prazos para a presentación de solicitudes das distintas liñas de axudas convocadas polo Instituto Galego da Vivenda e Solo quedan en suspenso durante o tempo que dure esta situación.
O cómputo dos prazos volverá a activarse unha vez se volva á normalidade. Esta medida é aplicable a tódalas axudas en materia de vivenda que se atopan en prazo de solicitude actualmente, afectando especialmente a aquelas cuxos prazos remataban nas próximas semanas.
Actualmente as liñas de axudas para as que se poden presentar solicitudes son: mellora da eficiencia enerxética, sustentabilidade, conservación e mellora da seguridade e accesibilidade das vivendas; áreas de rehabilitación dos Camiños de Santiago e das Illas Atlánticas; promotores de vivendas para alugueiro; préstamos para rehabilitación de vivendas; adquisición de vivendas en concellos de menos de 5.000 habitantes; adquisición de vivendas en centros históricos; bono de alugueiro social; Programa de Infravivenda; e rehabilitación de vivendas de mestres, outros oficios e outras de titularidade municipal.
Por outra banda, o Instituto Galego de Vivenda e Solo mantén a tramitación das axudas para aqueles colectivos sociais máis desfavorecidos e en situación de vulnerabilidade, así como as vítimas da violencia de xénero, ao abeiro do programa Bono de alugueiro social.
