O Concello de Muros vai organizar para a semana unha xornada informativa destinada a mostrar todas as liñas de axudas á rehabilitación de vivendas no seu centro histórico. Será o próximo mércores 26 de febreiro, as 18.30 horas na antiga fábrica de Sel. A xornada coincide coa apertura, esta mesma semana, dunha nova convocatoria municipal de subvencións para a rehabilitación de edificios e vivendas no seu casco histórico, financiada con fondos Next Generation da Unión Europea.
As axudas son de ata 21.400 euros por vivenda, contía que nalgúns casos poderase incrementar ata un máximo de 1.000 euros por vivenda ou 12.000 euros por edificio obxecto de rehabilitación.
“Este programa de axudas forma parte das distintas medidas de apoio á vivenda e conservación do casco histórico que impulsamos desde o concello”, asegurou a alcaldesa de Muros, María Lago, que anunciou “outras iniciativas neste ámbito a curto e medio prazo”.
As actuacións obxecto de subvención nesta nova convocatoria son para a mellora ou rehabilitación de edificios e vivendas, “sempre que o proxecto inclúa unhas determinadas intervencións de mellora da eficiencia enerxética”.
As solicitudes poden presentarse no prazo de dous meses dende o día seguinte á publicación da convocatoria no BOP da Coruña (martes 18 de febreiro).
