A concelleira de Cultura de Ribeira, Antía Alberte, e co técnico Unai González presentaron este xoves 6 de febreiro as bases do Festival de Murgas e o Concurso de Disfraces do Entroido 2024 que sairá publicadas no Boletín Oficial da Provincia nos vindeiros días e que teñen o obxectivo de fomentar a creatividade entre a veciñanza de Ribeira e, tamén, doutros concellos da contorna. Indicaron que o tradicional Desfile e Concurso de Murgas e Comparsas será o vindeiro domingo 2 de marzo pola tarde. “Trátase dun evento que conta con gran aceptación popular e participación do tecido asociativo polo que agardamos que así sexa tamén nesta edición na que ademais repartiremos 6.000 euros entre premios e gratificacións”, sinalaron.
Explicaron tamén que a data límite para que as charangas (murgas) e comparsas interesadas se inscriban nesta convocatoria será o xoves 20 de febreiro, antes das 13:00 h, presentando a ficha de participación e toda a documentación no Rexistro do Concello de forma presencial ou telemática a través da sede electrónica segundo corresponda.
Para unha mellor organización e desenvolvemento do desfile e do concurso establécese un máximo de 12 murgas participantes na categoría adulta, 6 na categoría infantil e 6 comparsas. E no caso de recibírense máis solicitudes, serán seleccionadas pola organización tendo en conta en primeiro lugar a antigüidade de participación neste evento e en segundo lugar a data e número de rexistro da súa inscrición no festival.
Todas as charangas e comparsas deberán participar no desfile polas rúas de Ribeira e unha vez rematado, comezará o festival no escenario que se habilitará para tal fin nunha carpa que estará instalada na praza de Pontevedra.
No festival actuarán en primeiro lugar as comparsas e charangas infantís. E posteriormente comezará a fase de concurso na que só participará a categoría de Murgas Adultas.
Como indican as bases as letras das murgas (infantil e adulta) deberán ter unha extensión máxima de 2 cancións, non superiores no seu conxunto a 80 versos, nin dunha duración total superior a 12 minutos, quedando excluídas aquelas actuacións que superen esta duración. As letras deberán ser de creación propia e promoverase o uso da lingua galega, feito que será de especial valoración por parte do xurado no momento da súa deliberación.
Para as comparsas, a duración máxima dos bailes non poderá ser superior aos 10 minutos.
Ao remate do Festival procederase á entrega dos premios (na categoría de Murgas Adultas) así como as gratificacións ao resto de murgas e comparsas participantes.
Como se indicou ao comezo, establécese a contía total de 6.000 € para o festival. Só por participar as murgas e comparsas recibirán unha gratificación de 200 €, que poderá chegar a 299 € no caso de que a mesma asociación/entidade participe en dúas categorías distintas.
En canto aos premios para as murgas adultas da fase do concurso, haberá como sempre tres premios, dotados de 1000 € o primeiro premio, 600 € o segundo premio e 400 € o terceiro premio, pero tamén creouse nesta ocasión un premio especial para a mellor charanga local con 800 € que se entregaría no caso de que ningunha murga adulta do municipio de Ribeira acadase o primeiro premio; este galardón entregaráselle á agrupación local que obtivese a maior puntuación.
A outra proposta que avanzaron Alberte e González é o Concurso de Disfraces de Entroido que, segundo fixeron saber, este ano vén con novidades. Por unha banda celebrarase o concurso de disfraces na modalidade infantil, para nenas e nenos menores de 18 anos, con premios cun importe de 500 € e que se celebrará o martes 4 de marzo pola tarde no marco da festa infantil de Entroido. Todas as persoas participantes no concurso deberán desfilar na pasarela que se organizará en dita festa infantil e enviar unha fotografía do participante disfrazado (sacada no momento do desfile na pasarela) ao enderezo electrónico comercio@ribeira.gal. Neste correo electrónico deberanse indicar os seguintes datos persoais: nome e apelidos do participante, teléfono de contacto e achegar copia do DNI do pai/nai/titor do participante. Esta imaxe será a empregada para a deliberación do xurado, cedendo o dereito da imaxe ao Concello de Ribeira.
O prazo para remitir os datos solicitados así como a fotografía dos participantes desfilando é o seguinte: dende o martes 4 de marzo no momento de realizarse o desfile ata o luns 10 de marzo ás 23:59 h.
Outorgaranse cinco premios valorados en 100 euros cada un, distribuídos en bonos para mercar no comercio local.
E por outra banda organizarase o concurso na modalidade de adultos, que contará con novas categorías e que como novidade estará en funcionamento dende o venres 28 de febreiro ás 12:00 h ata o mércores 5 de marzo ás 22:00 h. “É dicir”, sinalaron, “o concurso non se vai desenvolver nunha soa xornada como ata agora, senón que estará activo ao longo de todo o Entroido, para que todas as persoas que se disfracen poidan optar a participar e levar algún dos premios”.
O concurso na modalidade de adultos outorga premios distribuídos en catro categorías.
INDIVIDUAL
1o PREMIO: 150 €
2o PREMIO: 75 €
3o PREMIO: 50 €
PARELLA/TRÍO (mínimo dúas persoas, máximo tres)
1o PREMIO: 250 €
2o PREMIO: 150 €
3o PREMIO: 100 €
GRUPO (mínimo de catro persoas)
1o PREMIO: 425€
2o PREMIO: 250€3o PREMIO: 150 €
Ademais, este ano créase unha nova categoría de ENTERRO DO FELIPE cos seguintes premios:
a)Premio individual ao mellor disfrace de chorón/chorona: 100 €
b)Premio ao grupo máis numeroso de choróns/choronas : 300 €
A mecánica de funcionamento deste concurso será a mesma dos anos pasados. As persoas ou grupo de persoas maiores de idade que desexen participar deberán acudir disfrazados a algún dos locais hostaleiros adscritos a este certame e solicitar unha tarxeta de participación. Os participantes nas categorías individual, parella/trío ou grupo, deberán selar esta tarxeta ao menos en tres dos locais participantes para que sexa válida e sacar a fotografía do disfrace diante ou nun destes locais participantes.
Todos os participantes no concurso, independentemente da categoría na que participen, deberán enviar a imaxe da tarxeta cuberta e a fotografía do disfrace ao enderezo electrónico comercio@ribeira.gal.
Pola súa banda, os participantes na categoría enterro do Felipe deberán facer unha fotografía durante o desfile do Enterro do Felipe en Ribeira ou calquera outra parroquia do municipio que celebre este evento, enviala ao enderezo electrónico comercio@ribeira.gal. Neste correo electrónico deberanse indicar os seguintes datos persoais: nome e apelidos do participante, teléfono de contacto e achegar copia do DNI do participante para a categoría individual e do representante para a categoría grupal.
O prazo para remitir a fotografía por correo electrónico así como os datos indicados e a tarxeta selada é o mesmo para todas as categorías, comezando o venres 28 de febreiro ás 12:00 h (momento no que comeza o concurso) e podendo facelo ata o luns 10 de marzo ás 23:59 h.
Dende o Concello queren destacar tamén que “para o desenvolvemento deste concurso na modalidade de adultos precísase da colaboración dos locais hostaleiros da cidade polo que aqueles establecementos que queiran participar deberán inscribirse no enderezo electrónico comercio@ribeira.gal ou no telf. 686 58 70 00 a partir da data de publicación dos concursos no Boletín oficial da Provincia (BOP) e como data límite ata xoves 20 de febreiro de 2025 ás 23:59 h”.
Aos locais participantes entregaránselle tarxetas coa ruta dos distintos locais hostaleiros que deberán entregar aos clientes que desexen concursar. Esta tarxeta deberanlla selar/asinar aos concursantes en cada establecemento participante en que o soliciten.
As bases completas destes concursos así como do Festival de Murgas e Comparsas estarán colgadas na páxina web municipal (ribeira.gal).
