A XXIX edición dos Premios de Teatro María Casares está a prepararse para a súa gala de entrega que terá lugar o xoves 3 de abril no Teatro Rosalía Castro da Coruña e como todos os anos dende 2017 encárgase a ilustración dos carteis a diferentes artistas. Desta volta a elixida para levar a cabo este traballo foi a ilustradora ribeirense Sonia García, formada en Ilustración na Escola Pablo Picasso da Coruña e en fotografía na Escola Mestre Mateo de Santiago de Compostela. O mar á súa principal fonte de inspiración e a súa traxectoria profesional transita entre a fotografía, a ilustración e a videocreación. No eido editorial, é a autora do álbum de Sementes (Xerais, 2017) e asinou as ilustracións de álbums de diferentes autores e autoras tanto nesta editorial como para Galaxia. É o caso de títulos como A cidade do átomo, de Iria Misa (Xerais) ou Caderno de Cores, de Magín Blanco (Galaxia). O seu traballo pódese consultar na súa web Xouba Cromática.
A xeito de dato, sinalar que en convocatorias anteriores ilustraron o cartel dos galardóns: David Rubín, Xulia Vicente, Leo Sousa, Paula Mayor ou Aldara Prado.
Para o cartel dos Premios de Teatro María Casares, a autora sinala que apostou pola “simboloxía que encerran para o sector escénico as furgonetas”, símbolo da “itinerancia, das xiras, de espazo común e colaborativo e mesmo de fogar”. Para a autora, o cartel procura representar así a “unidade dos diferentes oficios teatrais” e como dentro dunha furgoneta se pode trasladar todo o mundo que atesoura unha obra de teatro. Sonia García, ademais, decidiu facer “unha homenaxe ao cartel do ano 2021, elaborado por Andrea López”, ao recuperar a máscara do teatro que se representara daquela e “tatuala” na propia furgoneta. García traballou con Manuel Silva, artista multidisciplinar e deseñador gráfico, na realización das adaptacións do cartel aos diferentes formatos que se publicarán dende hoxe até a celebración da gala de entrega en abril.
Indo aos Premios de Teatro María Casares, dicir que os espectáculos e profesionais finalistas dos XXIX Premios de Teatro María Casares daranse a coñecer a finais de febreiro, durante a tradicional Festa de Finalistas que este ano volverá celebrarase en Compostela, na Cafetería Lasso do Auditorio de Galicia. A primeira quenda de votacións mantense aberta até o vindeiro 17 de febreiro e un total de 48 espectáculos inscribíronse nesta edición.
Os Premios María Casares están organizados pola Asociación de Actores e Actrices de Galicia (AAAG) dende a súa posta en marcha en 1997 e contan cada ano coa colaboración de institucións e entidades como a Xunta de Galicia, a Deputación da Coruña, o Concello da Coruña, o Padroado de Cultura do Concello de Narón a Fundación AISGE ou Gadisa.
