A arte de ser mal pai, protagonizada por Xosé M. Esperante (Lampón, Boiro,1976) chega á TVG e á súa plataforma de streaming Agalega. A nova comedia de Óscar Cruz e Jorge Boquete estreouse na plataforma esta fin de semana tralo seu paso polos máis prestixiosos festivais internacionais centrados nos novos contidos dixitais. Os tres capítulos xa están dispoñíbeis e os creadores comparten deste xeito a alegría das primeiras críticas: “A xente xa nos pide a segunda temporada”, aseguran.
Esta traxicomedia producida por Miraveo conta cun notábel palmarés en certames de prestixio como os Premios Mestre Mateo da Academia Galega (Mellor Serie Web), o Carballo Interplay (Mellor Serie V.O. galego e Premio do Público) e o gran premio do xurado no Serielizados Fest, como Mellor Piloto do Showcase no seu 10ª aniversario.
Óscar Cruz e Jorge Boquete recoñeceron que xa traballan nos seus próximos proxectos de ficción tras conseguir o seu 5º premio Mestre Mateo con A arte de ser mal pai. Esta serie conta a historia dun pai corentón interpretado por Xosé M. Esperante, obrigado a despedirse da súa filla, a novísima e poderosa actriz Jacoba de Llano.
Durante os tres días nos que sucede a historia, os creadores ofrecen unha ollada sobre os desafíos da paternidade e a complexidade do que significa ser adolescente neste mundo moderno. Protagonizada por Xosé M. Esperante e Jacoba de Llano, xunto as interpretacións de grandes actores e actrices como Marita Martínez, Sabela Arán, Fede Pérez ou María Costas.
