Este sábado, o Auditorio do Centro Cultural e Xuvenil de Muros acollerá a representación de Testosterona, da produtora Malasombra, unha comedia que aborda a desigualdade laboral desde “unha perspectiva única e reflexiva”. A obra narra a competición entre un home e unha muller por un cargo de máxima responsabilidade nun medio de comunicación, explorando factores como a capacidade, o sexo ou a experiencia. O elenco está formado por Luís Iglesia (Matalobos, Serramoura) e Camila Bossa (La Unidad, Matalobos).
Testosterona é unha obra escrita por Xoque Carvajal que nos conta a historia do director dun importante medio de comunicación que debe deixar o seu posto en mans dun dos seus dous subdirectores. Unha é muller, home o outro.
Xoque Carbajal adapta neste espectáculo a obra Testosterona da escritora mexicana Sabina Berman. Trátase dunha comedia que fala da desigualdade laboral por cuestión de sexo.
A concelleira de Cultura, Caridad González, subliña que con Testosterona “queremos ofrecer ao público a oportunidade de reflexionar sobre a desigualdade no ámbito laboral dunha maneira amena e accesible, sen perder de vista a gravidade do tema. Esta comedia non só provoca risas, senón tamén reflexións sobre cuestións tan relevantes e actuais como a igualdade de xénero nas altas esferas profesionais”.
Sábado, 1 de febreiro ás 20:30 h
Auditorio do Centro Cultural e Xuvenil de Muros
Duración: 75 minutos
Público: +13 anos (PA)
Entrada: 3,50 €
