La máquina del buen rollo acende de novo o seu motor. Logo dunha pausa para preparar novos temas e mellorar o seu directo, a banda muradá The Rapants iniciará este venres, 24 de xaneiro, a tempada de concertos de 2025, unha xira que levará por título La máquina del buen rollo: cambiamos la rayita del peinado, e coa que actuarán en distintos puntos da Península Ibérica. A primeira parada do percorrido é o Inverfest: The Rapants presentarán o seu último disco o día 24 na Sala But de Madrid. Aínda é posíbel adquirir entradas en liña para quen ande ese día por Madrid.
The Rapants aterrará esta fin de semana en Madrid tras uns meses de pausa, nos que tiveron ocasión de descansar -tras unha intensa xira o ano anterior-, preparar novos temas e, especialmente, mellorar un directo que inclúe cambios con respecto do show presentado no 2024, coa intención de que as persoas asistentes aos concertos “gocen aínda máis” dunha proposta que destaca especialmente pola súa intensidade e conexión co público.
Logo da actuación no Inverfest, as seguintes paradas xa confirmadas pola banda son algunhas das citas musicais máis relevantes e coñecidas de Galicia. É o caso da Festa do Queixo de Arzúa, FIV de Vilalba, O Son do Camiño, SonRías Baixas ou Caudal Fest. Son os primeiros nomes que se coñecen dunha xira coa que a banda visitará novos escenarios.
Ademais, os muradáns serán a banda de apertura dos concertos da nova xira de La Raíz, que regresa aos escenarios logo de seis anos de ausencia. Os rapantes abrirán os directos do grupo liderado por Pablo Sánchez nos concertos que estes ofrecerán o 22 marzo no Coliseum da Coruña (últimas entradas á venda en Ataquilla.com) e o 26 de abril en Avilés, cuxas entradas xa están agotadas.
Primeiras datas confirmadas de La máquina del buen rollo. Tour 2025
24.01 | Inverfest (Sala But, Madrid)
15.03 | Festa do Queixo
22.03 | Xira La Raíz (Coliseum, A Coruña)
25-26.04 | FIV de Vilalba.
26.04 | Xira La Raíz (Pabellón de La Magdalena, Avilés)
12-14.06 | O Son do Camiño
02.08 | SonRias Baixas19-20.09 | Caudal Fest
