A Asociación Cultural Barbantia anunciou que vai celebrar a súa asemblea xeral ordinaria o vindeiro venres 31 de xaneiro no Auditorio Municipal de Rianxo. A primeira convocatoria dará comezo ás 18.30 e a segunda e derradeira a partir das 19.00 horas.
Na mesma xornada do 31 de xaneiro e na mesma localización (o Centro Sociocultural Auditorio de Rianxo) Barbantia levará a cabo a presentación (ás 20.30 horas) do libro Os mortos que amei, de Iria Collazo, coa intervención de Antón Riveiro Coello, escritor e vogal da A. C. Barbantia; Marcos Valcárcel, editorial Galaxia; María Xesús Blanco, presidenta da A. C. Barbantia e do alcalde de Rianxo, Julián Bustelo Abuín, amais da propia autora Iria Collazo.
No acto contarase cunha intervención plástica a cargo do escultor Camilo Seira.
A apertura e o peche musical virá da man de Leo Sánchez Figueiro (piano), da Escola de Música de Rianxo.
Este acto está enmarcado nos Actos Castelao 2025 que organiza o Concello de Rianxo.
A maiores, lembrar que a saída do suplemento cultural A Voz de Barbantia número 201 será o sábado 1 de febreiro conxuntamente con La Voz de Galicia.
