Ás veces, da a impresión de que o sector pesqueiro galego está máis nas mans de Madrid ou Bruxelas que da propia comunidade autónoma galega. E sendo certo que ambas as capitais dispoñen de moitas máis responsabilidades que Santiago de Compostela sendo esta a capital de Galicia, a rexión pesqueira máis importante da UE, o repouso que deixa este feito no sector galego non ofrece moita seguridade sobre o que aquí, en Galicia, estamos a facer a prol de nós mesmos en materia de pesca.
Así se evidenciou días atrás na toma de posesión de Patricia García Sánchez como nova directora xeral de Pesca da Xunta, cargo no que substitúe a Antonio Basanta por pasar este a integrarse no equipo do comisario europeo do ramo, Costas Kadis.
O conselleiro de Pesca, Alfonso Villares, no acto de toma de posesión de Patricia García e de despedida de Basanta, ao tempo que agradeceu a este os servizos prestados e daba a benvida á súa substituta, referíuse a Antonio Basanta como a persoa que agora “seguirà” insistindo en afortalar a pesca galega dende a Comunidade Europea.
Tan pouco se confía na Consellería de Pesca como elemento indispensable nese afortalamento do sistema conector Galicia-UE, como para entender que o cable que une unha e outra parte na relación bipartita é máis feble precisamente alí onde Europa albisca o forte de Galicia que non é outro que a pesca?. Ten que vir de Bruxelas ese ánimo que, ao parecer, decae aquí, en Galicia; non abonda coa nosa realidade como potencia pesqueira?. Vai ser un outro galego -dos varios que exerceron responsabilidades en Bruxelas- quen lle quite as castañas do lume ás distintas frotas galegas?. Non chega coa realidade do propio sector galego, que preside as máis importantes organizacións pesqueiras internacionais?. Ou estamos a vivir enganados, coma de prestado?.
Como é sabido, varios galegos desempeñaron en Bruxelas postos de grande responsabilidade na organización comunitaria encargada da Pesca. Cal é a súa pegada, que quedou deles?. Canto ten que agradecer o sector pesqueiro galego a un cidadán desta comunidade autónoma
o labor realizado en Bruxelas, no seo da UE, pola súa repercusión directa na pesca?…
Talvez o erro radica en considerar que todo se resolve na capital administrativa da comunidade europea, cando a verdadeira solución debera ter base alí onde percute realmente (por máis que o ruido atrone aló).
