Emoción na visita de Melchor, Gaspar e Baltasar á Pobra

05 Xaneiro 2025

Os Reis Magos enchoupan de maxia A Pobra do Caramiñal a pesar da choiva

A Pobra do Caramiñal viviu un 5 de xaneiro cheo de ilusión coa chegada de Melchor, Gaspar e Baltasar, que non faltaron á súa tradicional visita a pesar das adversidades meteorolóxicas. A chuvia obrigou a cancelar o percorrido polas parroquias e a cabalgata habitual, pero non conseguiu apagar as ganas de ver ás súas maxestades do Oriente, que concentraron toda a súa maxia no polideportivo municipal de Venecia.

A xornada comezou cunha visita á residencia de maiores, onde os Reis saudaron ás persoas residentes, levando un anaco de ilusión aos máis veteranos. Posteriormente, desprazáronse ao pavillón, que estaba ateigado de familias e crianzas desexosas de vivir a maxia dun día tan especial.

Espectáculos e tradicións nun ambiente cheo de ledicia

A celebración, organizada pola Concellaría de Servizos Municipais, contou cunha posta en escena espectacular da man de Barafunda Animación e Pablo Méndez Compañía. O público gozou de zancudos, aves do paraíso, anémonas e bolas de Nadal que fixeron do pavillón un espazo máxico. Co acompañamento musical do grupo Trécola, os Reis Magos fixeron a súa entrada triunfal, sendo recibidos entre aplausos e sorrisos.

Unha vez alí, a Pobra do Caramiñal transportouse a Belén grazas a unha “máquina do tempo”, recreando a ofrenda do ouro, incienso e mirra ao neno Xesús, coa estrela do Oriente guiando o camiño das súas maxestades.

Mensaxes de ilusión, solidariedade e comunidade

O alcalde, José Carlos Vidal, abriu o acto cunha benvida cargada de bos desexos de solidariedade e paz para a vila. A continuación, os tres Reis Magos tomaron a palabra. Baltasar emocionou a todos ao recoñecer que “a maxia deste día durará ata que volvamos vernos no vindeiro ano, convertendo os vosos soños en realidade”.

Gaspar destacou a ledicia e a ilusión reflexadas nos rostros do público: “Os ollos son o espello da alma, e a vosa ledicia é o reflexo da maxia deste día”. Tamén repasou algunhas das peticións feitas polos máis pequenos.

Melchor, pola súa parte, sorprendeu co seu truco de maxia con tres moedas, que provocou abrazos e sorrisos entre os asistentes, enchendo o pavillón de agarimo e boas vibracións.

A festa continúa

A celebración prolongouse durante toda a tarde con música, animación e unha degustación de roscón de Reis acompañado de zumes. Mentres tanto, os nenos e nenas tiveron a oportunidade de entregar as súas últimas cartas e peticións ás súas maxestades.

Para quen queira revivir este día inesquecible, o Concello da Pobra do Caramiñal puxo a disposición o acto completo nas súas plataformas de Facebook e YouTube. Unha xornada que, malia a choiva, quedará gravada na memoria de todos como un exemplo de como a maxia dos Reis Magos pode superar calquera adversidade.

Outros artigos

Publicidade

Revista en papel

Opinión

“Fallos de bondade”. José A. López Silva

“Fallos de bondade”. José A. López Silva

En maio de 2013, a Universidade de Syracuse, no estado de Nova York, encargoulle pronunciar o discurso para os seus graduados a un dos profesores do claustro, o escritor George Saunders, que catro anos despois gañaría o Booker británico con Lincoln en el Bardo, unha...

O Barbanza
Resumo de privacidade

Esta web utiliza cookies para que podamos ofrecerche a mellor experiencia de usuario posible. A información das cookies almacénase no teu navegador e realiza funcións tales como recoñecerche cando volves á nosa web ou axudar ao noso equipo para comprender que seccións da web atopas máis interesantes e útiles.