O Concello de Boiro colabora coa Asociación BarbanTEA para garantir unha recepción dos Reis Magos inclusiva, o vindeiro domingo entre as 11.30 e as 13.30 horas no local Leñaverde do Centro Social de Boiro. O alcalde, José Ramón Romero, e a concelleira de Ensino, Carmen Silva, participaron na presentación xunto con Patricia Halcón e Milagros Torrado, membros da Asociación.
Esta actividade está destinada a un público infantoxuvenil, principalmente aquel que teña hipersensibilidade ou diversidade funcional que lle dificulte a súa asistencia á Cabalgata ou recepción dos Reis Magos pola cantidade de estímulos auditivos ou visuais.
“Dende o Concello de Boiro estamos moi contentos de colaborar con iniciativas como esta da Asociación BarbanTEA que redundan en melloras da calidade de vida dos nosos nenos e nenas, especialmente aqueles que padecen autismo ou algunha diversidade funcional”, afirmou o alcalde.
