O Concello de Padrón lembra que este martes 31 de decembro celebrarase a San Silvestre Padronesa 2024, un evento deportivo e solidario orientado a recoller alimentos para as familias máis necesitadas da contorna.
Esta proba, de carácter non competitivo, iniciarase ás 17:00 horas, co punto de partida e chegada no paseo do Espolón. As persoas interesadas poderán inscribirse o propio día da carreira, entre as 15:45 horas e 10 minutos antes do seu comezo. Para formalizar a inscrición, deberán achegar un quilo de alimentos non perecedoiros, que serán entregados a Cáritas Padrón.
O percorrido, de 5,7 quilómetros, inclúe un tramo neutralizado inicial de 1 quilómetro e outro tramo aberto de 4,7 quilómetros, pasando por rúas emblemáticas da vila, como a rúa Nova, a rúa Longa e a praza da Leña.
O Concello de Padrón engade que a proba é “accesíbel para todos os públicos, xa que pode completarse correndo, camiñando ou en bicicleta”.
Os menores de idade deberán ir acompañados “dun adulto responsábel”.
O Concello de Padrón disporá de servizos como duchas, avituallamento na liña de meta e servizo de gardarroupa. Ademais, entregarase un obsequio conmemorativo a todas as persoas participantes, ata esgotar existencias.
A San Silvestre Padronesa é unha actividade que combina deporte e solidariedade, ofrecendo á cidadanía unha maneira diferente e altruísta de despedir o ano. O Concello de Padrón anima a toda a veciñanza a participar.
