O vindeiro domingo, 5 de xaneiro, Rois converterase nun escenario de ilusión e festa coa visita dos Reis Magos, que percorrerán todas as parroquias do municipio para saudar aos máis pequenos e encher de espírito nadalicio o concello. A xornada contará cunha ampla programación de actividades organizadas polas asociacións veciñais e comisións de festas, que teñen preparado merendas e obradoiros para facer máis entretida a espera e fomentar a convivencia durante o Nadal.
Os tres Reis Magos iniciarán o seu percorrido en Rois ás 10.45 horas e rematarán a xornada en Oín coa tradicional ofrenda ao Neno Xesús. Ao longo do día, a comitiva visitará Buxán (11.30), Leroño (12.00), Augasantas (12.20), Ermedelo (15.00), Urdilde (15.45), Costa (16.30), Herbogo (17.15), Seira (17.45), Sorribas (18.15) e Ribasar (18.45).
En cada parada, os Reis serán recibidos con actividades pensadas para todos os públicos, que inclúen merendas e obradoiros creativos para animar a celebración. Esta proposta busca implicar a toda a comunidade e converter o día nunha experiencia inesquecible para as familias de Rois.
A festa promete ser unha xornada máxica e chea de ledicia, onde os máis pequenos poderán ver de preto aos Reis Magos e vivir un día único no marco das celebracións do Nadal.
