Este 18 de decembro a sede da Asociación de Empresarios de Ribeira acolleu o acto de entrega de entradas gratuítas para a pista de xeo impulsada pola patronal na explanada do porto. As entradas foron dar a diversas asociacións sen fin de lucro con presenza no concello.
No acto de entrega estiveron presentes o presidente da asociación, Francisco Martínez Gude, e o concelleiro e primeiro tenente de alcalde de Ribeira, Vicente Mariño, ademais dos representantes da Fundación Faibén e da Cruz Vermella de Ribeira.
Pista de xeo ata o 12 de xaneiro
Para celebrar ao grande deste Nadal, a explanada do porto de Ribeira (o Malecón) acolle dende o 5 de decembro e até o 12 de xaneiro unha pista de xeo de 250 metros cadrados para o desfrute de veciños e visitantes. Trátase dunha iniciativa da Asociación de Empresarios que contou cos permisos de Portos e coa colaboración dos Concellos de Ribeira, da Pobra do Caramiñal e de Porto do Son, co obxectivo de completar e enriquecer a oferta destes territorios da comarca do Barbanza durante as festas de Nadal e fortalecer, a maiores, a dinamización comercial durante estas celebracións.
O custe é de sete euros, con tarifa rebaixada para entidades sociais, colexios ou asociacións de nais e pais. Ademais, as patronais dos ditos territorios distribuirán entradas entre os establecementos participantes (sectores comerciais, da hostalería e da restauración) para seren repartidas entre os seus clientes, fomentando deste xeito as compras durante estas festas sinaladas.
