As XIX Xornadas de Información Sociosanitaria de Outes proseguen este xoves 19 de decembro cunha nova actividade de divulgación: a conferencia Hipertensión arterial: diagnose, tratamento e seguimento, impartida polo doutor Antonio Pose Reino, da Unidade de Hipertensión e Risco Vascular do Servizo de Medicina Interna do Complexo Hospitalario Universitario de Santiago (CHUS). A conferencia desenvolverase novamente no salón de actos da Casa da Cultura da Serra de Outes, a partir das 18.30 horas.
A coordinación da xornada corre a cargo do doutor Xosé Mª Dios Diz, médico especialista de Atención Primaria de Outes.
Ao final do acto, o relator será agasallado cunha figura de artesanía feita polos usuarios da asociación inclusiva comarcal ADISBISMUR Valadares (Outes).
Máis actividades do ciclo
A axenda das Xornadas cubrirá os meses comprendidos entre outubro de 2024 e maio de 2025 e incluirá un completo programa de conferencias e coloquios sobre as máis diversas cuestións, cada xoves de cada mes ás 18.30 horas na Casa da Cultura de Outes.
O programa está novamente coordinado polo doutor Xosé María Dios Diz, médico especialista de Atención Primaria de Outes, coa colaboración do Concello (Centro Social), da Universidade de Santiago (USC), da asociación inclusiva ADISBISMUR e da Asociación Cultural Terra de Outes, e tamén da Xerencia de Xestión Integrada de Santiago.
Logo da cita deste 19 de decembro, o 30 de xaneiro de 2025 intervirá o doutor Miguel Ángel Martínez Olmos, xefe do Servizo de Endocrinoloxía e Nutrición da Área Sanitaria de Santiago e Barbanza, co relatorio Diabetes: a epidemia silenciosa.
O 27 de febreiro celebrarase Deporte de saúde, a cargo de Adrián Dios Vicente, presidente da Agrupación Deportiva de Baloncesto Fontiñas e profesor na Facultade de Ciencias Económicas da USC.
O 27 de marzo será a quenda do relatorio Proxecto Xenoma, a cargo do doutor Anxo Carracedo Álvarez, coordinador do Grupo de Medicina Xenómica da Universidade de Santiago de Compostela.
O 10 de abril celebrarase a conferencia Enfermidades abdominais. Calidade de Vida, da man do doutor Manuel Barreiro de Acosta, da Unidade de Enfermidades Inflamatorias Intestinais do CHUS.
A clausura das xornadas celebrarase o 29 de maio, con Envellecemento saudábel, a cargo de Xosé María Dios Diz, médico especialista de AP de Outes.
A organización das xornadas pregan confirmar asistencia e reservar praza a través do teléfono 981 850 575.
