O Concello da Pobra informou do inicio da terceira fase da reforma integral do Camiño Real, no treito correspondente co Conchido. O alcalde José Carlos Vidal salientou a importancia destas obras non “só dende o punto de vista de mellora das infraestruturas, senón tamén medioambiental”. Pola súa banda, a concelleira das Obras, Patricia Lojo, sinalou que “este é un exemplo máis do compromiso e esforzo do Concello por achegar servizos básicos á veciñanza.”
Procederase coa creación dunha rede separativa de recollida de augas pluviais e de saneamento, cos respectivos pozos de rexistro e sumidoiros necesarios. Disporase de diversos bombeos que canalizarán as verteduras cara á estación depuradora de augas residuais da Pobra. Finalmente, reporase todo o firme con aglomerado asfáltico, logo da fresadura do pavimento actual. A dita intervención foi adxudicada á empresa Eulogio Viñal Obras y Construcciones, S.A., por un importe total de 90.512’61 euros, cun prazo de execución de 4 meses.
