O Concello de Boiro celebra no Pazo de Goiáns os días 14 e 15 de decembro a XX Exposición da Camelia Sasanqua e Outras. A concelleira de Cultura e Turismo, María Outeiral, presentou na mañá deste martes 10 de decembro o programa de actividades desta edición.
O acto inaugural da mostra está previsto para o sábado 14 de decembro ás 17.00 horas e contará coa participación da Escola de Música de Boiro. No transcurso de apertura realizarase a plantación dun exemplar de camelia sasanqua. Dende as 18.00 e ata as 20.00 horas haberá un photocall de traxes tradicionais para todas aquelas persoas que se acheguen a visitar a exposición, que estará aberta ata as 20.30 horas.
O domingo a exposición abrirá en horario de mañá de 11.00 a 14.00 horas e pola tarde de 17.00 a 20.30 horas. Ás 19.00 horas haberá unha actuación de Germán Díaz, Uxía e Sergio Tannus, Alalás e Cantigas do Camiño de Santiago.
Van participar nesta exposición un total de 28 expositores, que completarán 48 metros de flor con expositores de toda Galicia e tamén Asturias. “O Pazo de Goiáns ten un atractivo especial para realizar eventos como este pola cantidade de árbores e plantas que se atopan na súa finca“, afirmou a concelleira María Outeiral.
