Os bombeiros do parque Provincial de Ribeira participaron este mediodía nun operativo provocado polo incendio nun transformador eléctrico situado no soto da Casa Consistorial de Ribeira.
O lume foi extinguido polo sistema automático do propio transformador. Durante a actuación os bombeiros provinciais fixeron comprobacións de gases na estancia.
As primeiras informacións chegaron un cuarto de hora despois das 14:00. Segundo a información recollida polo 112 Galicia, saltara unha alarma de incendio na casa consistorial do auditorio, na rúa de Portugal.
Decontado, desde o CIAE 112 Galicia informouse aos Bombeiros de Boiro, ao GAEM de Ribeira, á Policía Nacional e á Local e á Agrupación de Voluntario de Protección Civil de Ribeira.
Os membros do GAEM acudiron á zona e indicaron que había falta de osíxeno na estancia, o que podía deberse á explosión dun extintor. Por precaución, decidiuse proceder ao desaloxo do edificio.
Trala chegada da dotación dos Bombeiros de Boiro, estes explicaron que non se vira nada afectado pois non chegou a arder nada, senón que se vaciaran tres botellas de extinción. Ademais, realizaron labores de ventilación no inmoble.
