A escritora e actriz rianxeira Esther Carrodeguas vai estar este sábado 30 de novembro en Muros representando a función O único que verdadeiramente quixen toda a vida é ser delgada de ButacaZero. Será a partir das 20.30 horas no auditorio do Centro Cultural e Xuvenil de Muros, cun prezo de 3,50 euros. Trátase dunha obra recomendada para maiores de 16 anos. As reservas pódense facer xa en liña ou ben nas oficinas do Centro Cultural e Xuvenil de Muros en horario de 8:00 a 15:00 h
A compañía ButacaZero, liderada por Esther F. Carrodeguas, creadora da aclamada obra Iribarne, un dos grandes referentes do teatro galego deste ano, presenta unha nova proposta que promete conmover e sorprender. O único que verdadeiramente quixen toda a vida é ser delgada é un monólogo escrito e protagonizado pola propia Carrodeguas, no que aborda a complexa relación co corpo e a gordofobia dunha sociedade que idealiza estándares de beleza inalcanzábeis. Cunha mestura de sinceridade e humor irónico, a obra reflexiona sobre como esta discriminación afecta tanto á sociedade como ao noso interior. Dirixida por Xavier Castiñeira e acompañada en escena polo artista multidisciplinar Juanma LoDo, que asina a sonoplastia, esta peza contemporánea ofrece unha experiencia escénica única que mestura crítica, emoción e unha gran dose de valentía.
A concelleira de Cultura, Caridad González, destacou que “traer a Muros unha obra de ButacaZero é unha mostra máis do noso compromiso por ofrecer teatro de calidade. Esta peza convida a reflexionar sobre temas tan universais como a identidade e a aceptación, ao tempo que recoñecemos o enorme talento de Esther Carrodeguas. Animo á veciñanza a non perderse esta oportunidade única”.
