Prosegue esta fin de semana a axenda do I Ciclo Cultural Infantil Itinerante de Porto do Son. E farao coa función Carapuchiña vermella, de Educateatro Producións, que presenta o espectáculo como “un trepidante musical onde cativos e maiores acompañarán á protagonista na gran aventura de levarlle á súa avoa unha cesta coa merenda atravesando un bosque cheo de sorpresas”. Durante o camiño, Carapuchiña aprenderá a respectar o medio ambiente e os animais, bailará e cantará, pero tamén coñecerá os perigos de non facer caso dos consellos da súa nai. Plácido, o xornalista da aldea, e o seu axudante Roi, serán os encargados de manter informado ao público de todo o que lle suceda á protagonista ata que chegue á casa da avoíña…
A función será este domingo 1 de decembro na Casa da Cultura de Porto do Son, a partir das 18:00h. A entrada será gratuíta e as entradas poden ser recollidas nas Casas da Cultura de Portosín e Porto do Son. Organiza a Área de Cultura do Concello coa colaboración de Cultura da Deputación.
