O Concello de Porto do Son compartiu os detalles da terceira edición do seu Concurso de Nadal destinado á iluminación e decoración exterior de vivendas no termo municipal. Repartiranse premios entre as tres mellores propostas: un lote de Nadal valorado en 150 euros, un lote de Nadal de 100 euros e outro de 50 euros.
Poderán participar de balde neste concurso todas as persoas veciñas de Porto do Son que decoren o exterior dos seus domicilios situados no termo municipal coa iluminación e/ou os motivos de Nadal, apreciábeis dende a vía pública.
As inscricións están abertas até o 16 de decembro ás 12.00 horas. As persoas interesadas deberán enviar un vídeo onde se aprecie toda a decoración e a iluminación da vivenda adobiada á conta de correo portodosoncultura@gmail.com, a onde tamén terán que achegar o formulario de inscrición. De xeito complementario, a inscrición pode levarse a cabo presencialmente na Casa da Cultura de Porto do Son (rúa Atalaia, nº 11 15970 Porto do Son). O fallo do xurado farase público o 17 de decembro na páxina web do concello de Porto do Son e nas redes sociais.
