Ese 30 de novembro proseguen as funcións da primeira Mostra de Teatro de Porto do Son. Farao co espectáculo Arte sen guión, unha peza de Miguel Canalejo que producida polo Centro Dramático Galego e Galeatro que tenta, dende as ferramentas da improvisación contemporánea, responder á seguinte pregunta: existiu o teatro medieval galego? Catro comediantes representan os entremeses compilados nun estraño códice da Idade Media enchendo as partes incompletas coa axuda do público e tratando de agochar todos os anacronismos que introducen polo seu descoñecemento da época. Unha relectura dun tempo deostado e unha comedia que nos lembra que nin antes eran tan antigos, nin agora somos tan modernos.
A función será este sábado 30 de novembro na Casa da Cultura de Porto do Son ás 21.00 horas. As entradas pódense adquirir na oficina da Área de Cultura do Concello, en horario de luns a venres de 9.00 a 14.00 horas. Ás 21.00 horas pecharanse as portas do auditorio (prégase puntualidade).
Intérpretes: Alba Bermúdez, Miguel Canalejo, Cris Iglesias, Nacho Martín e Patricia Martínez.
Dirección e dramaturxia: Miguel Canalejo
Espazo Sonoro: Nacho Martín
Deseño Escenografía: Alba Bermúdez
Vestiario: Anahí Taraburelli
Iluminación: Gonzalo Porteiro
Espectáculo Co-Producido por CDG e Galeatro Compañía de Teatro
