O Coworking da Pobra celebrou unha nova xornada informativa e formativa con alumnado de centros educativos locais e comarcais. Catorce estudantes do ciclo medio de Instalacións de Telecomunicacións do IES Espiñeira de Boiro pasaron neste 19 de novembro polo centro de traballo colaborativo pobrense; unha xuntanza enmarcada no Campus de Emprendemento que se desenvolve nestas instalacións. Previamente (a semana pasada) recibiron a visita do alumnado do CIFP Coroso de Ribeira.
Na sesión deste martes a concelleira da Promoción Económica, Amparo Cerecedo, e a responsábel da asistencia técnica do Coworking da Pobra, Fátima Rodríguez, foron as encargadas de recibir os estudantes. Cerecedo trasladoulles os recursos materiais que pon o Concello á disposición da cidadanía co obxectivo de “favorecer o espírito emprendedor, ademais do apoio técnico en todo o proceso de posta en marcha dun negocio”. A este respecto, Fátima Rodríguez, precisou que se ofrece asesoramento e acompañamento integral dende o inicio da andaina empresarial. De feito, non é necesario facer uso do propio espazo para solicitar orientación, sinalou.
Deseguido a rapazada asistiu a un obradoiro sobre habilidades sociais para emprender da man de Verónica Rodríguez, socia da consultora Promove, focalizado na importancia da colaboración, do traballo en equipo e de establecer sinerxías. E, a través da actividade Café con…, coñeceron a experiencia da cooperativa de mercadotecnia dixital Kracia.
Ofrecéronselle así actividades adaptadas ao seu perfil e formación; un valor engadido destes campus vivenciais que se erixen como fórmula para promover o autoemprego como opción de futuro no mundo laboral para a mocidade.
O Coworking da Pobra botou a andar no 2017 e consta de dous espazos: o Emprende, destinado a persoas emprendedoras que fagan uso desta prestación de maneira continuada, e o Nómades, dirixido a quen utilice o centro de xeito puntual. En 2022, formalizouse a integración na Rede Provincial de Espazos de Traballo Colaborativo da Deputación da Coruña.
