Desesperación entre os donos de máquinas expendedoras e lavanderías de autoservizo na Pobra do Caramiñal e Ribeira polos continuos roubos.
Os donos de varios postos de máquinas expendedoras e lavanderías de autoservizo na Pobra do Caramiñal e Ribeira están a vivir unha situación desesperada debido aos continuos roubos. O último incidente tivo lugar na madrugada do martes, cando un ladrón empregou un método insólito para levar os cartos: atacou unha das máquinas a machadazos.
Segundo as imaxes que reproduce a TVG o ladrón golpeou repetidamente a máquina expendedora ata esnaquizala e acceder á recadación. Dámaris Mallo, dona dun dos postos na Pobra do Caramiñal, viu o roubo a través das cámaras de seguridade desde a súa casa.
O ladrón rompeu o metacrilato co machado e meteu a man para acceder á caixa dos cartos, chegando mesmo a cortarse. Non é o primeiro roubo que sofren, pero nunca viran algo así.
Dámaris está desesperada e non sabe que máis medidas de seguridade tomar. Mesmo está a considerar pechar os negocios, pois nin os seguros queren facerse cargo xa dos roubos e danos ocasionados polos ladróns.
