O goberno local de Outes presentará no pleno ordinario de outubro unha proposta para aumentar a taxa do lixo a partir de 2025. Esta decisión responde ao recente incremento do canon que SOGAMA impón aos concellos, que pasará de 60 € a 108 € por tonelada tratada, o que suporá un aumento anual de 110.000 € para o Concello. Segundo fontes do executivo, a taxa non se actualiza desde 2016, período no que os custos de recollida e transporte se duplicaron, pasando de 100.000 € a máis de 200.000 € anuais.
A proposta do goberno implica un incremento do 35% para as vivendas, pasando de 64,66 € a 87,30 € anuais. A administración local argumenta que esta nova taxa segue sendo inferior á que se aplica en outros concellos que non adoptaron a suba de SOGAMA. Ademais, a nova estrutura da taxa busca rectificar desigualdades previas, aumentando as cotas para establecementos comerciais de maior tamaño e introducindo unha tarifa progresiva para os hoteis, baseada no número de prazas.
Aínda que se prevé que a nova taxa aumente os ingresos, o Concello anticipa que os gastos para 2025 ascenderán a 546.000 €, mentres que os ingresos estimados poderían alcanzar, no mellor dos casos, 400.000 €.
Finalmente, o goberno municipal criticou a postura dos populares de Outes, acusándoos de demagoxia ao ignorar que o aumento da taxa é consecuencia do “incremento brutal e unilateral” da factura de SOGAMA e a Xunta de Galicia.
