Esta fin de semana, entre o venres 25 e o domingo 27 de outubro, celébrase nos establecementos hostaleiros de Boiro a nova edición (a décima) da Ruta Barbanza Arousa, máis que tapas, impulsada pola mancomunidade de concellos formada por Boiro, A Pobra do Caramiñal, Ribeira e Rianxo (Barbanza Arousa).
Este ano o desenvolvemento do roteiro materializarase ao longo das fins de semana de outubro e novembro, coa idea de “aportar unha actividade dinámica para os establecementos de hostalaría na tempada baixa”.
Comeza como dixemos en Boiro, do 25 ao 27 de outubro; continuando en Rianxo, do 1 ao 3 de novembro; para seguir en Ribeira, do 8 ao 10 e rematando na Pobra do Caramiñal, do 15 ao 17 de novembro.
“Nesta edición, seguindo a evolución dos últimos anos, prevese que o número de establecementos participantes supere os 40 locais comprometidos con esta iniciativa”, manifestou na presentación da ruta Fátima Cachafeiro, xerente da Mancomunidade.
Ademais de organizar unha actividade que trata de incentivar a demanda na hostalaría en tempada baixa, “o obxectivo tamén pasa por promover o produto local desde a gastronomía, tanto o produto fresco coma a conserva, e os viños da IXP Barbanza e Iria”.
Na edición anterior, o impacto económico no territorio desta iniciativa superou os 40.000 euros, entre a venda de tapas e as consumicións que acompañaban ás mesmas. Neste ano estímase que supere esa cifra.
Ao igual que na convocatoria do ano 2023, a promoción da actividade irá da man de influencers do territorio que a través das súas canles en redes sociais promoverán a asistencia e participación nesta X edición da Barbanza Arousa Máis Que Tapas.
Como novidade, apostouse por incluír actividades diferenciadas en cada un dos concellos como son unha ruleta da sorte, cata de viños, obradoiro de cociña infantil e agasallos sorpresa para os participantes.
