A Asociación Cultural Barbantia, o Liceo Marítimo de Ribeira, o xornal La Voz de Galicia e o Concello de Ribeira organizan esta semana a presentación do novo libro do escritor ribeirán Antonio Piñeiro, Inzo, que vén con ilustracións do artista compostelán afincado na nosa comarca Veiras Manteiga. A cita será este venres 25 de outubro ás 20.30 h no salón principal do Liceo Marítimo de Ribeira. Intervirán María Xesús Blanco (presidenta da AC Barbantia), Xosé Luís Veiras Manteiga (artista plástico), Antonio Piñeiro (autor) e Antía Alberte Maneiro (concelleira de Cultura de Ribeira).
A maiores, dende Barbantia informan que o suplemento cultural A Voz de Barbantia número 198 sairá este sábado, 26 de setembro, con La Voz de Galicia.
Un proxecto innovador
Inzo componse dun grupo de pezas poéticas de Antonio Piñeiro e pinturas orixinais de Veiras Manteiga. Para dar forma ao proxecto, Veiras Manteiga traballou os orixinais en técnica mixta: tintas, acrílicos e colaxes mesturados na liña mais actual da sua obra, próxima á síntese e a abstracción lírica, con leves referencias figurativas; mentres que as pezas de Antonio Piñeiro van impresas a máquina de escribir. O proxecto Inzo toma a testemuña dunha proposta anterior, Mansío, froito da colaboración entre Eva Veiga e o propio Antonio Piñeiro e xurdida (tamén) ao abeiro do Espazo Cultural do Liceo Marítimo.
