O Concello de Ribeira presentou este 16 de outubro o se proxecto para crear, en palabras do Goberno local, “un novo modelo de cidade”. Este será o espírito dunha das grandes iniciativas do Executivo tripartito: a reforma da praza do Centenario, cuxos detalles foron debullados polo alcalde, Luís Pérez Barral, e os concelleiros Francisco Suárez-Puerta e Juan Luis Furones, xunto co arquitecto Ángel Cid, do estudio 2C Arquitectos.
Segundo fixeron saber, o obxectivo do novo modelo urbano é “gañar espazos públicos centrados nas persoas, mellorando a mobilidade e aumentando as zonas verdes”. Tamén explicaron que as reformas da dita praza (destinadas a reverdecer e mellorar os espazos destinados ás persoas) constitúen o seguinte paso logo do proceso de mellora do Centenario, que presenta unha serie de deficiencias, como filtracións de auga e humidades, que precisan ser emendadas.
O alcalde engadiu que a reforma da praza do Centenario está englobada na estratexia de mellorar a mobilidade e o fluxo de persoas entre o barrio das Avesadas, praza do Concello e praza de España. Para iso, establecerase unha plataforma única entre dous enclaves referentes de Ribeira como son o Centenario e a praza do Concello. Esta plataforma estenderase desde a actual praza do Centenario cara a rúa Otero Pedrayo pero tamén cara á praza Uxío Novoneyra e rúa Mendiño, na que xa se está a actuar.
Tamén se implantará plataforma única desde a praza do Centenario cara a rúa Avesadas, xerando un espazo a modo de “adro” para o edificio do novo Auditorio “xa que actualmente a beirarrúa é demasiado estreita”, explicaron, engadindo que coa actuación unificaranse os pavimentos en toda a área, usando formigón puído nas zonas que soporten tráfico rodado e formigón lavado nas contornas peonís. Ademais, incluirase a dotación de nova iluminación pública e mobiliario urbano.
O rexedor Luís Pérez Barral informou que “estas actuacións sentan as bases para outro modelo de cidade; centrado nas persoas, gañando espazos de uso para o benestar da veciñanza, mellorando a mobilidade e reverdecendo os espazos públicos para que as zonas verdes sexan protagonistas e non excepcións”. Pérez Barral salientou que tras estas reformas reforzarase a seguridade viaria reducindo os riscos de accidentes e atropelos, porque o criterio é “protexer vidas” e engadiu que “este proxecto é o inicio dun camiño cara a unha Ribeira máis verde, segura e habitábel”.
O arquitecto encargado do proxecto, Ángel Cid, introduciu unha reflexión sobre o reto das vilas e cidades para recualificar o espazo público. Cid abordou o pasado histórico e manifestou que Ribeira medrou coa presión dos vehículos e en moitos casos o espazo quedou colonizado por eles, deixando pouco espazo para as persoas. Neste senso, dixo, o que se está tratando de facer é reequilibrar eses espazos: “Non se trata tanto de peatonalizar e de quitar os coches, senón que a ocupación do vehículo sexa aquela necesaria para o seu uso cotián e ao mesmo tempo dar maior relevancia aos peóns na rúa para dinamizar a vida social, comercial por por suposto a accesibilidade universal”, dixo Cid.
Esta adxudicación está englobada no marco da actuación subvencionada polos fondos europeos de fortalecemento da actividade comercial. A empresa adxudicataria foi UTE Xestión Ambiental de Contratas, S.L – Prace Servicios y Obras, S.A. por un importe de 1.118.766€. A isto súmaselle os 109.122,47 euros que se están investindo na rúa Mendiño.
