A familia dos Bolechas creada polo debuxante Pepe Carreiro vai estar esta semana en Boiro para achegar á rapazada un dos seus novos espectáculos: Os Bolechas tocan nunha grande orquestra. Será ás 20.00 horas do venres 18 de outubro, na Casa da Cultura de Boiro. Os Bolechas tocan nunha grande orquestra é unha función de monicreques encadrada no programa FalaRedes (Secretaría Xeral de Lingua) e para público infantil e familiar. É unha proposta dirixida a toda a familia que combina o teatro de monicreques coa música, para que nun contexto distendido e alegre os nenos e as nenas poidan gozar de novas experiencias en galego.
Carlos, Pili, Loli, Braulio, Sonia e Tatá, xunto co seu can Chispa, deciden construír un escenario musical despois de atopar unha caixa chea de instrumentos musicais para ofrecer un gran concerto. A medida que as melodías do tambor, a guitarra, o piano ou a frauta soan, aprenden os diferentes estilos musicais e compoñen as súas propias cancións.
