Entre as moitas incidencias (das que fomos dando conta neste medio co paso das horas) que provocou o furacán Kirk ao seu paso polo Barbanza figuran varios importantes asolagamentos nas zonas de Outes, de Porto do Son e de Noia, e tamén en Lousame. O furacán, que tivo o pico de intensidade nesta madrugada e na primeira hora da mañá, cebouse con instalacións como o pavillón do instituto de Porto do Son, derrubando unha parede lateral do pavillón deportivo sen que houbese danos persoais e provocando que os bloques quedaran ciscados pola superficie exterior, sumándose ao longo da madrugada outros elementos do pavillón. As clases foron suspendidas e así llelo fixo saber a dirección do centro ás familias a través da aplicación Abalar.
En Outes Kirk cebouse co Colexio da Serra, onde tamén foi preciso cancelar a actividade docente por mor do anegamento sufrido polo centro, cunha enchente no andar baixo do mesmo que provocou numerosos danos materiais coa mala sorte de que o colexio fora obxecto, recentemente, dunha importante reforma. O asolagamento veu motivado pola enchente do río Tins, que discorre moi próximo e que rebordou coa intensidade das chuvias, afectando a varias vivendas e propiedades da Serra. En Noia o Traba tamén xerou inquietude entre a veciñanza, sobre todo na contorna dos muíños de Pedrachán, nas proximidades xa do centro histórico. A maiores, rexistráronse cortes de luz nos concellos de Noia, Lousame e parte de Porto do Son, e foi preciso cortar o corredor de Noia-Santiago por un corremento de terra á altura de San Xusto.
