O Partido Popular de Ribeira, a través da concelleira Juana Brión, presentou un rogo para ser debatido en pleno no que propón asfaltar o estacionamento exterior do IES Leliadoura e máis a recolocación da Marquesiña xunto o Centro de Saúde de Ribeira.
No relativo á primeira parte do rego, explican no seu rogo que “se ben sabemos que hai uns meses foi asfaltada a estrada que transcorre pola parte lateral e traseira do IES Leiliadoura en Frións, non sabemos, sen embargo, se foi por despiste que non se fixese o acondicionamento do aparcadoiro dianteiro exterior que presenta varias fochancas que non foron reparadas, unha necesidade que se podería ter emendado coas ditas obras”.
Na segunda parte do rogo instan á recolocación da marquesiña que estaba a carón do Centro de Saúde de Santa Uxía, e que foi retirada debido ao seu esnaquizamento por actos vandálicos, “xa que é utilizada, aparte de usuarios do transporte público, como parada de buses escolares, e a súa colocación evitaría que os usuarios non estean a intemperie como así nolo están a transmitir as familias”.
Por todo o devandito, pídese o seguinte:
-Que sexa mellorado o aparcadoiro exterior do IES Leliadoura, á maior brevidade “xa que non é dunha gran dimensión, que se asfalte de novo e pinten novamente a prazas de aparcamento, así evitaremos ter que parchear en breve”.
-Reinstalar a marquesiña que foi retirada no seu día xunto o Centro de Saúde de Ribeira para que os usuarios do transporte público poidan ter onde resgardarse das inclemencias do tempo.
