O I Ciclo Cultural Infantil Itinerante de Porto do Son, que avanzamos dende O Barbanza os días pasados, arrinca este 29 de setembro cunha divertida función para todos os públicos: Os Fabulosos Cleaners, en palabras dos seus creadores (Malasombra Producións) “unha experiencia visual para participar toda a familia”. A cita será domingo 29 ás 18.00 horas na Casa da Cultura de Portosín. Terá unha duración de 60 minutos e está recomendada para nenas e nenos de máis de tres anos.
A entrada é de balde e pode ser recollida previamente nas casas da cultura do Son e de Portosín. Ás 18.00 horas do día da función pecharanse as portas do auditorio. Organiza a Área de Cultura do Concello en colaboración coa Deputación da Coruña.
A parte técnica da función está dirixida polo autor alacantino Luis Beviá, que percorreu medio mundo co seu universo xabonoso (Londres, Hong-Kong, México, Colombia, Perú, Cuba, Grecia ou Islandia, entre outros).
A función xira arredor de dous operarios da limpeza do teatro que descobren por casualidade as posibilidades que lles ofrecen as súas ferramentas de traballo combinadas con auga e xabón. A partir de aí, os personaxes emprenderán unha excitante viaxe conducidos polas fantásticas pompas e burbullas.
Ficha da función
Actores: Xoque Carbajal e Jouse García
Autoría: Luis Beviá e Xoque Carbajal
Dirección: Marcos Orsi e Xoque Carbajal
Clasificada: Todos os públicos
Recomendada: A partir de 3 anos
Duración: 60 minutos
