O alcalde rianxeiro, Julián Bustelo, e os membros da Asociación Cabalar “De Ruta en Ruta” presentaron este luns 23 a II Xuntanza Cabalar de Ruta en Ruta que terá lugar o vindeiro sábado 28 de setembro. Segundo fixeron saber, grazas á nova edición (a segunda) deste roteiro máis de 300 persoas daranse cita en Rianxo para percorrer a cabalo distintas paraxes do territorio. O rexedor destacou a importancia de eventos destas características “que atraen a Rianxo a persoas chegadas de diferentes puntos de Galicia e que se converten en embaixadoras do noso municipio”.
O roteiro comezará ás 15.30 horas, previa reunión dos xinetes ás 15.00 horas en Taragoña (Campo Maneiro), e durante o percorrido levarán a cabo dúas paradas para o obrigado descanso. Pola noite, sobre as 22.30 horas celebrarase unha cea para as e os xinetes participantes. Logo haberá sorteos e animación musical con DJ Pablo Grande. Haberá duchas e área de acampada, segundo confirmou a organización.
