O Pazo da Mercé, na Listaxe Vermella do Patrimonio de Hispania Nostra

16 Setembro 2024

A Lista Vermella do Patrimonio que mantén actualizada online a asociación Hispania Nostra denunciando o estado de abandono dos tesouros da xeografía española, vén de engadir un novo inmóbel do Barbanza aos seus rexistros, que sumar á Casa da Cadea (A Pobra) e a Telleira de Quintáns (Rianxo). Trátase do Pazo da Mercé, na Pobra.

Sinalar que recentemente un dos grandes tesouros do patrimonio da comarca, o Pazo de Goiáns, foi quen de saír da listaxe vermella e asentarse na verde grazas aos esforzos do Concello e outras administracións.

Historia do Pazo de Mercé (ficha de Hispania Nostra)

En orixe, século XVI, o Pazo de Mercé foi unha capela á que acudían moitos devotos e que acabou por converterse nun priorado beneditino dependente de Santiago. Tivo o seu máximo esplendor ao longo dos séculos XVII e XVIII. Segundo testemuña frei Martín Sarmiento, foi tamén usado como albergue. A época de priorado finalizou coa desamortización, que deu lugar á venda do edificio e os terreos en poxa pública.

O escudo barroco da fachada (do século XVIII) representa nos seus brasóns ao león do reino de León, o castelo do reino de Castela, un piñeiro flanqueado por veneras xacobeas da abadía de San Martiño Pinario e un león asido a un báculo de abade da Real Congregación de Santo Benito de Valladolid.

Tense constancia de que o escritor Ramón María del Valle-Inclán residiu no pazo de 1917 a 1921 alternando coa súa residencia en Madrid, anos nos que escribiu obras tales como Luces de bohemia, Los cuernos de don Friolera e Divinas Palabras. Naceron ademais alí, dous dos seus fillos, Carlos Luis Baltasar e María de la Encarnación Baltasara.

Descrición (Hispania Nostra)

Este pazo atópase nos arredores da Pobra do Caramiñal, en dirección Boiro seguindo a estrada comarcal AC-305. O edificio actual é resultado de reformas acaecidas durante os séculos XVIII e XIX. Trátase dun edificio de planta rectangular, con base de cantería de granito revogado e encalado, que presenta unha fachada con catro vans adintelados na planta superior que forman portas balconeiras, dúas delas con reixas de ferro e un escudo labrado en pedra entre os vans. Tiña ademais da zona de residencia, unha capela propia xa desde os seus inicios, unha fonte e un pombal. A capela está decorada con motivos relixiosos entre os que se pode recoñecer unha imaxe da Virxe co neno en brazos. Foi utilizada ata hai dez anos aproximadamente, ao contrario que o resto do pazo, abandonado xa á súa sorte desde que o asolou un incendio en 1983.

Estado de conservación

O pombal, un dos poucos de planta cadrada de Galicia, esborrallouse en 2021. En 1983 un incendio destruíu parte do pazo, perdéndose un retablo barroco de 1697 e unha imaxe medieval da Virxe aleitando ao Neno. Da fachada foi roubada a imaxe pétrea dun Trono de Gracia.

Outros artigos

O PSOE de Ribeira acusa ao Executivo local de “falta de propostas”

O PSOE de Ribeira tamén fixo balance do ano de Goberno do PP e PBBI logo da moción de censura consumada en outubro do ano pasado. No seu balance afirmou que a alcaldesa, coincidindo co primeiro aniversario da moción de censura, "segue sen ofrecer solucións á fronte da...

+

Publicidade

Revista en papel

Opinión

“Cuando la huelga cambia de destinatario”. José Castro López

“Cuando la huelga cambia de destinatario”. José Castro López

Vaya por delante que la huelga es una conquista consagrada que tienen los trabajadorespara reivindicar y defender sus derechos. De hecho, en lo que llevamos de democraciatodas las huelgas generales se convocaron por razones laborales contra las políticas delGobierno...

O Barbanza
Resumo de privacidade

Esta web utiliza cookies para que podamos ofrecerche a mellor experiencia de usuario posible. A información das cookies almacénase no teu navegador e realiza funcións tales como recoñecerche cando volves á nosa web ou axudar ao noso equipo para comprender que seccións da web atopas máis interesantes e útiles.