A plataforma Stop Deshaucios Barbanza vén de compartir un novo caso dunha familia da comarca en risco de ser desaloxada da súa vivenda habitual. Segundo explica a plataforma, o Xulgado Número 2 de Ribeira comunicou a unha familia de Santa Uxía unha denuncia por desafiuzamento, interposta por parte da empresa Altamira Santander Real Está SA, por “falta de pagamentos de alugueiro”. A empresa, explican dende Stop Deshaucios, é unha gran propietaria que ten a obriga de garantir á familia un alugueiro social, se se demostra a situación de vulnerabilidade.
O Xulgado xa deu traslado do asunto ao departamento dos Servizos Sociais de Ribeira para a elaboración do correspondente Informe Social de Vulnerabilidade, por se procede a suspensión do procedemento e a garantía dunha alternativa habitacional.
Trátase dunha familia monoparental, cun menor a cargo, e o cabeza de familia percibe unha pequena pensión. A familia presentou a correspondente solicitude de Asistencia Xurídica Gratuíta para que lle designen avogado e procurador de oficio e así poida presentar a correspondente oposición ao desaloxo da vivenda.
