A semana pasada o Concello de Porto do Son achegou nova información sobre o proxecto local para construír un novo centro de saúde. Segundo confirmou o alcalde, Luis Oujo, a Consellería de Sanidade xa deu o visto e prace ao predio que o Consistorio achegou como alternativa ao edificio non rematado de vivendas da zona de Outeiro, que non cumpría cos requirimentos de accesibilidade e sustentabilidade recomendados. A nova proposta, que o Goberno local viña valorando dende hai tempo, é unha parcela duns cinco mil metros cadrados situada entre a Casa do Concello e a Casa da Cultura. O rexedor explicou que o seguinte paso é a redacción do proxecto por parte da Consellería, sendo a previsión telo listo nesta recta inicial do outono.
O proxecto tamén inclúe a posta en valor da antiga alameda da vila de Porto do Son, segundo engadiu Oujo, que recoñeceu a probabilidade de que con este nova proposta os procesos para construír o ambulatorio se estenda no tempo, pero o importante é que se parte dun base sólida de viabilidade, sinalou.
O rexedor tamén confirmou que ante a inevitábel tramitación destes procesos e a posíbel demora, o Concello proseguirá coa posta a punto do actual centro de saúde. Neste intre estase a traballar en materia de mantemento para mellorar o illamento e rematar coas filtracións de auga (nas xanelas) e coas pingueiras durante a tempada invernal de chuvias e garantir a máxima sustentabilidade enerxética posíbel.
Estas novidades poñen fin ao proxecto de rehabilitar a estrutura inacabada do Outeiro e convertelo en centro de saúde, logo de que confirmarse que Porto do Son fora un dos 15 concellos galegos beneficiados da concesión dun préstamo da Consellería de Medio Ambiente para a compra e posta en valor de inmóbeis deteriorados (no caso do Son fora unha contía de 300.000 euros).
O rexedor explicou en declaracións recentes que os técnicos do SERGAS víronse obrigados a desbotar este proxecto por cualificalo de “pouco funcional”, comezando polo feito de ser unha estrutura de varias alturas, o que impide, de base, as vantaxes dunha construción baixa para facilitar a accesibilidade, entre outros beneficios.
Polo que respecta á nova parcela, xa conta cun visto e prace previo dos técnicos do SERGAS, que se remonta a 2022.
